Курсның тасвирламасы

Әлеге курс “Гаиләдә татарча мохит” дип атала. Әлбәттә, бу бик шартлы атама. Курсның максаты – татар гаиләсенә яки гаиләдә татарча мохит тудырырга теләгән башка гаиләләргә ярдәм итү; хәзерге заманда нинди чыганаклар, файдалы ресурслар бар – әнә шуларны күрсәтү; татар телле ата-аналарның, белгечләрнең уңышлы тәҗрибәсе белән уртаклашу; бала үсешендә татар теленең әһәмиятен ассызыклау, татар телен кечкенәдән өйрәтүгә караган  тискәре “мифлардан” арыну.

Ә “мифлар” төрле. Кайберәүләр баланың аң үсеше тоткарланыр, башка телләр, фәннәр татар теле хисабына аксар дип уйлый.  Бу мифлар – берничә кешенең тәҗрибәсеннән, тормыштагы тискәре тәҗрибәсеннән килеп туган фикерләр генә. Боларның берсе дә галимнәр, социологлар, психологлар, лингвистлар һ.б. тарафыннан тикшерелеп дәлилләнмәгән. Шушы фикерләргә генә таянып эш итсәк, яшәсәк, әлбәттә, телебез, аның артыннан мәдәниятебез, милләтебез бетәчәк, тарих онытылачак. Әлеге мифларны җимереп, булган ресурсларны кулланып гаиләбездә, бала клубларында, тәрбия һәм уку йортларында татарча мохит тудырыйк. Курс әти-әниләргә, тәрбиячеләргә, укытучыларга файдалы һәм кызыклы булыр.